Fasnacht 2020

Blaggedde 2020

Heb di fescht


D Fasnacht bruucht e kai Kontrolle.
Heb di fescht, si kunnt jetz z rolle.
Fünf Fasnächtler uff däm Trotti
wisse, dass me daas nit sotti.
Aagää mien die fünf do nit,
denn es faart eleggtrisch hit.
Und esoo gseesch du die Naare
in d Fuessgängerzoone faare.
Grad d Frau Fasnacht duets gärn gsee.
Si darf halt e bitzli mee
und si sait, jetz hauet druff,
machet d Waggisschnuuren uff.
Nämet alli draa mit Witz
aber au e bitzli spitz.

Am Majoor gfallt daas enorm.
Stolz gseesch dää mit Uniform.
Soone Waggis ruesst ganz scheen
und dr Harlekin pfyfft Deen.
S duet e Kind dur d Larve gnaisse
und e Hampfle Räppli schmaisse.
Zvoorderscht styrt dr Gloon e bitz
und si keie nit uf d Schnitz.
Mit vyl Muet geen sii ans Wäärg,
heb di fescht, am Spaalebäärg.
Soo vyl Schwung kaasch nur dert hoole.
Noochemache nit empfoole.

D Fasnacht gseesch du soo komplett
uff däm glaine Trottinett.
Wäär isch soone Faarzyghalter?
Daas isch wider dää Kurt Walter.
Sy Entwurf goot gly zum Müller
und d Blaggedde wird e Knüller.
Heb di fescht und heb si fescht,
denn am Revers isch si s Bescht.
s Fasnachts-Comité

 

 


 

Mohrekopf 2020 Sujet

 

Sujet: Denglisch oder Baseldytsch
 

Reminder oder Erinnerig, nice oder nätt,
Event oder Fescht, have oder hätt
Meeting oder Dräffe, Livestyle oder Lääbestiil,
Account oder Konto, Stick oder Bääsestiil
Plum Cake statt Zwätschge-Waaie,
d Grossmamme duet sich im Grab umdraie
Feertig luschtig; Stupid Boys eh nadierlig Dummpeter demonschtriere;
me sott uffheere wyter unseri Sproch z kaschtriere

Voortraab

sin glaini Waggis, wo schuelschprochig verwirrt sin

Guggemajoor

isch e grosse Dummpeter

Spiil

sin 52 Dummpeter, wo demonschtriere

 


 

Mohrekopf Fasnachtsplan 2020

Fasnachtsplan 2020

 


 

Gänderti Routeplan vom Comité